ബംഗ്ലാദേശിനെതിരായ രണ്ടാം ട്വന്റി 20യിൽ അയർലൻഡിന് തോൽവി. നാല് വിക്കറ്റിനാണ് ബംഗ്ലാദേശിൻ്റെ വിജയം. അവസാന ഓവർ വരെ ത്രില്ലടിപ്പിച്ച ശേഷമാണ് ഐറീഷ് സംഘം കീഴടങ്ങിയത്. മത്സരത്തിൽ ആദ്യം ബാറ്റ് ചെയ്ത അയർലൻഡ് 20 ഓവറിൽ ആറ് വിക്കറ്റ് നഷ്ടത്തിൽ 170 റൺസെടുത്തു. മറുപടി ബാറ്റിങ്ങിൽ 19.4 ഓവറിൽ ആറ് വിക്കറ്റ് നഷ്ടത്തിൽ ബംഗ്ലാദേശ് ലക്ഷ്യത്തിലെത്തി. സ്വന്തം നാട്ടിൽ ബംഗ്ലാദേശിൻ്റെ ഏറ്റവും ഉയർന്ന റൺചെയ്സാണിത്.
നേരത്തെ ടോസ് നേടിയ അയർലൻഡ് ബാറ്റിങ് തിരഞ്ഞെടുക്കുകയായിരുന്നു. ക്യാപ്റ്റൻ പോൾ സ്റ്റിർലിങ്ങിന്റെയും ടിം ടെക്റിന്റെയും വെടിക്കെട്ടിൽ മികച്ച തുടക്കമാണ് അയർലൻഡിന് ലഭിച്ചത്. സ്റ്റിർലിങ്ങ് 29 റൺസും ടെക്ടർ 38 റൺസും നേടി. 41 റൺസെടുത്ത ലോർക്കൻ ടക്കറാണ് ഐറീഷ് നിരയുടെ ടോപ് സ്കോറർ. ബംഗ്ലാദേശിനായി മഹെദി ഹസൻ മൂന്ന് വിക്കറ്റുകൾ വീഴ്ത്തി.
മറുപടി ബാറ്റിങ്ങിൽ ബംഗ്ലാദേശ് അനായാസം റൺസ് നേടിക്കൊണ്ടിരുന്നു. പർവേസ് ഇമോൺ 40, ക്യാപ്റ്റൻ ലിട്ടൻ ദാസ് 57, സൈഫ് ഹസൻ 22 എന്നിങ്ങനെ സ്കോർ ചെയ്തു. 14.5 ഓവറിൽ രണ്ടിന് 138 എന്ന നിലയിലായിരുന്നു ബംഗ്ലാദേശ്. അവിടെ നിന്ന് തുടരെ വിക്കറ്റുകൾ നഷ്ടപ്പെട്ടതാണ് ബംഗ്ലാദേശ് വിജയം വൈകിച്ചത്. 18.2 ഓവറായപ്പോൾ ബംഗ്ലാദേശ് സ്കോർ ആറിന് 157 എന്ന നിലയിലായി. എന്നാൽ മുഹമ്മദ് സൈഫുദീന്റെ ഏഴ് പന്തിൽ പുറത്താകാതെ 17 റൺസ് പ്രകടനം ബംഗ്ലാദേശിനെ വിജയത്തിലെത്തിച്ചു.
പരമ്പരയിൽ രണ്ട് മത്സരങ്ങൾ പിന്നിടുമ്പോൾ ഇരുടീമുകളും ഓരോ വിജയങ്ങൾ നേടിയിട്ടുണ്ട്. പരമ്പര വിജയികളെ നിർണയിക്കുന്ന അവസാന മത്സരം ഡിസംബർ രണ്ടിന് നടക്കും.
Content Highlights: